«BAGTYŇ BAKY MUKAMYDYR WATANYM!» ATLY DÖREDIJILIK DUŞUŞYGY
2023-nji ýylyň 14-nji iýulynda Erkin döredijilik mekanynda Türkmen döwlet neşirýat gullugynyň we «Adalat» gazetiniň redaksiýasynyň bilelikde guramagynda «Bagtyň baky mukamydyr watanym!» atly döredijilik duşuşygy geçirildi. Duşuşyga ýurdumyzyň halypa žurnalistleri, ýazyjy-şahyrlary, çeper döredijilik bilen gyzyklanýan ýaşlar, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Türkmen döwlet bedenterbiýe we sport institutynyň, Türkmen döwlet medeniýet institutynyň žurnalistika hünäri boýunça bilim alýan talyplary gatnaşdylar. Ýokary guramaçylyga eýe bolan duşuşygyň dowamynda çykyş eden halypa žurnalistler öz çykyşlarynda Gurbanguly Berdimuhamedow adyndaky haýyr-sahawat gaznasy, Alym Arkadagymyzyň «Ömrümiň manysynyň dowamaty» atly ajaýyp eseri, Arkadag şäheri we «Arkadag şäheri – geljegiň şäheri» atly kitabyň ähmiýeti, «Arkadag» gazeti, «Arkadag» teleýaýlymy barada, şeýle-de türkmeniň Beýik akyldar ogly Magtymguly Pyragynyň ajaýyp şygyrlarynyň gymmaty, Arkadag Serdarly bagtyýar ýaşlar ýylynda türkmen ýaşlarynyň döredijiliginde beýik ösüşlerimizi wasp etmekde «halypa-şägirt» ýörelgeleriniň orny dogrusynda aýratyn buýsanç bilen nygtadylar. Söz ussatlarynyň gatnaşmagynda halypa-şägirtlik duşuşyklarynyň yzygiderli geçirilmegi ýaş žurnalistleriň maglumat gorunyň baýlaşmagynda, döredijilik dünýäsine bolan höwesiniň artmagynda görelde mekdebi bolup durýar. Duşuşygyň ahyrynda halkymyzy eşretli durmuşda ýaşamaga, döredijilikli zähmet çekmäge döredýän ähli mümkinçilikleri üçin Gahryman Arkadagymyza, hormatly Prezidentimize çäksiz sagbolsunlar aýdyldy.
Gülnara MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.