AWSTRIÝANYŇ ÝEWROPA WE HOWPSUZLYK SYÝASATY INSTITUTYNYŇ WEKILI BILEN GEÇIRILEN DUŞUŞYKLAR
2026-njy ýylyň 11-nji martynda Türkmenistanyň Daşary işler ministrliginiň Halkara gatnaşyklary institutynda Awstriýanyň Ýewropa we Howpsuzlyk syýasaty institutynyň (AIES) müdiriýetiniň agzasy Martin Sajdigiň gatnaşmagynda duşuşyk geçirildi. Duşuşyk jenap Martin Sajdik bilen institutyň rektory G.Ýusupowanyň arasynda geçirildi. Duşuşygyň dowamynda taraplar ikitaraplaýyn akademiki hyzmatdaşlygyň geljegi, hususan-da ylmy barlaglary bilelikde alyp barmak we tejribe alyşmak meselelerini ara alyp maslahatlaşdylar.
Duşuşyk tamamlanandan soň institutyň professor-mugallymlarynyň we talyp ýaşlarynyň gatnaşmagynda okuw sapagy geçirildi. Okuw sapagynyň dowamynda hormatly myhman häzirki zaman halkara gatnaşyklarynyň iň möhüm meseleleri, hususan-da howpsuzlyk meseleleri we sebitara hyzmatdaşlygyň häzirki ýagdaýy barada özüniň çuňňur seljermeleri barada aýdyp geçdi. Ol öz çykyşynda diplomatiýanyň parahatçylygy üpjün etmekdäki we gapma-garşylyklaryň öňüni almakdaky üýtgewsiz ornuna aýratyn üns çekdi. Okuw sapagynyň ahyrynda talyplar häzirki zaman diplomatiýasynyň möhüm ugurlary boýunça özlerini gyzyklandyrýan soraglary berdiler. Hormatly myhman soraglara jogap berip, ýaşlaryň intellektual derejesine we olaryň halkara gatnaşyklaryna bolan gyzyklanmalaryna ýokary baha berdi.
Okuw sapagy tamamlanandan soň Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziň bilermenleri bilen duşuşyk geçirildi.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.