“AK ŞÄHERIM AŞGABAT” ATLY XXIV KÖPUGURLY HALKARA SERGI WE MASLAHAT
2025-nji ýylyň 24-25-nji maýynda Aşgabat şäher häkimliginiň we Türkmenistanyň Söwda-senagat edarasynyň bilelikde guramagynda «Ak şäherim Aşgabat» atly XXIV köpugurly halkara sergi we maslahat geçirildi. Oňa ýurdumyzyň döwlet we hususy edara-kärhanalarynyň, daşary ýurt kompaniýalarynyň 150-den gowragy öz öndürýän önümleri, hödürleýän hyzmatlary bilen gatnaşdy.
Sergä Hökümet agzalary, ministrlikleriň, pudaklaýyn dolandyryş edaralarynyň, Aşgabat şäher häkimliginiň, Türkmenistandaky diplomatik wekilhanalaryň ýolbaşçylary, ýurdumyzyň we daşary döwletleriň işewürleri, jemgyýetçilik guramalarynyň, köpçülikleýin habar beriş serişdeleriniň wekilleri, paýtagtymyzyň ýaşaýjylary, şeýle hem Türkmenistanyň Daşary işler ministrliginiň Halkara gatnaşyklary institutynyň talyplary gatnaşdylar.
Köpugurly çärede ýurdumyzyň birnäçe ýokary okuw mekdepleriniň diwarlyklary hem ýerleşdirilipdir. Sergä Diýarymyzda hereket edýän hususy bilim merkezleri hem işjeň gatnaşdy. Ýurdumyzyň we daşary döwletleriň işewürleri ýyladyş, sowadyş, elektrik ulgamlaryny çekmekde hödürleýän hyzmatlary bilen hem tanyşdyrýar. Serginiň çäklerinde şäher ilatynyň gündelik durmuşda peydalanmagy üçin dünýäniň iri önüm öndürijileriniň iň täze awtoulaglarynyň gurluşyk we jemagat hojalygy pudagynda ulanylýan tehnikalaryň görkezilişi-de guraldy.
Sergi meýdançasynda paýtagtymyz Aşgabadyň ähli ugurlar boýunça ýokary depginde ösmegini dowam etdirýändigine, onuň işewürlik üçin uly mümkinçiliklere eýedigine aýdyň göz ýetirmek bolýar. Köpugurly halkara sergi öňdebaryjy şähergurluşyk konsepsiýalary bilen tanyşmaga, şäheriň özboluşly binagärligine baha bermäge, döwlet ederalarynyň, senagat pudagynyň, innowasion önümçiliginiň wekilleri bilen özara bähbitli hyzmatdaşlygy ýola goýmaga amatly şertleri döredýär. Halkara parahatçylyk we ynanyşmak ýylynda Aşgabat şäheriniň güni mynasybetli geçirilen çäreler baý mazmuny bilen tapawutlanyp, paýtagtymyzyň dost-doganlyk we hyzmatdaşlyk merkezi hökmünde eýeleýän ornuny has-da pugtalandyrýar.
Seýitnepes GURBANMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.