ÄHLIHALK ÝOWARYNA IŞJEŇ GATNAŞYLDY
Ýowar – gadymyýetde bilelikdäki haýyr-sahawat zähmet diýlip atlandyrylypdyr. Bu gündogarda has ýaýran halk dessury bolup, ol türkmen halkynyň durmuşynda örän wajyp orny eýeläpdir. Bu gadymy däp-dessur bu günki gün hem öz ähmiýetini ýitirmän gelýär.
2024-nji ýylyň 16-njy martynda ýurdumyzda giňden bellenilýän Halkara Nowruz baýramçylygy mynasybetli Diýarymyzy göwrümli bagy-bossanlyga öwürmek möwsümine badalga beren Ählihalk ýowary geçirildi. Türkmenistanyň Daşary işler ministrliginiň hem-de Halkara gatnaşyklary institutynyň çäginde geçirilen ýowara institutyň professor-mugallymlary we talyp ýaşlary işjeň gatnaşdylar.
Hormatly Prezidentimiziň Diýarymyzy bagy-bossanlyga öwürmek baradaky çagyryşlaryna ruhubelentlik bilen seslenen ählihalk çäresine gatnaşyjylar ýowar güni bagy-bossanlykda ösüp oturan baglara ideg etdiler, agaçlaryň düýplerini agardyp, haşal otlary aýryp, tarp ýerleri depdiler. Şeýle hem dürli abadançylyk işlerini ýerine ýetirdiler.
Merjen JUMAGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.