28/11/2023
822
«Agro-Pak Türkmenistan – 2023» - azyk gaplama we oba-hojalyk önümleriniň halkara sergisi badalga aldy
2023-nji ýylyň 28-nji noýabrynda Aşgabat şäherinde «Agro-Pak Türkmenistan – 2023» – azyk gaplama we oba-hojalyk önümleriniň halkara sergisi öz işine başlady.
Ýurdumyzyň çäginde ilkinji gezek geçirilýän bu halkara sergini Türkiýe Respublikasynyň «Sofuar» kompaniýasy bilen bilelikde Türkmenistanyň Söwda-senagat edarasy gurnaýar. Onuň çäginde ýurdumyzyň köpsanly telekeçileri we kompaniýalary bilen birlikde Özbegistanyň, Türkiýäniň, Hytaýyň, Moldowanyň, Germaniýanyň, Azerbaýjanyň, şeýle-de birnäçe daşary ýurtlaryň degişli pudaklarynyň kompaniýalary özleriniň gaplama önümleri we gaplama enjamlary, çörek we çörek önümleriniň tehnologiýalary, oba hojalyk önümleri, azyk önümleri we iýmit goşundylary, däne saklaýyş we degirmen ulgamlary, ýyladyşhanalary, tohumlar we dökünleri, bagçylyk we tokaýçylyk önümleri, guşçulyk we maldarçylyk üçin niýetlenen enjamlary, suwaryş ulgamlary ýaly ugurlarda hyzmatlaryny we önümlerini hödürleýärler.
Galyberse-de, bu geçirilýän halkara sergiler halk hojalygy toplumyny döwrebaplaşdyrmakda ýurdumyzyň gazanýan üstünliklerini bütin dünýäde wagyz etmekde, milli ykdysadyýetimiziň kuwwatyny artdyrmakda, halkyň ýaşaýyş derejesini ýokarlandyrmakda ähmiýeti örän ulydyr.
«Agro-Pak Türkmenistan – 2023» halkara serginiň çäklerinde tejribe alyşmak hem-de özara bähbitli hyzmatdaşlygy ýola goýmak maksady bilen, ikitaraplaýyn duşuşyklary guramak hem meýilleşdirilýär.
Myrat MAKSADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.