Adam hukuklary boýunça okuw sapagy geçirildi
2024-nji ýylyň 12-nji aprelinde Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň gurnamagynda Gahryman Arkadagymyzyň 2024-nji ýylyň 22-nji fewralynda Türkmenistanyň Halk Maslahatynyň Prezidiumyndaky çykyşyndan gelip çykýan wezipeler boýunça okuw sapagy geçirildi. Oňa Türkmenistanda adam hukuklary boýunça ygtyýarly wekil – adalatçynyň kömekçisi, hukuk ylymlarynyň kandidaty Nury Kömekow we Türkmenistanyň Daşary işler ministrliginiň Halkara gatnaşyklary institutynyň talyplary gatnaşdylar. Sapagyň esasy maksady Türkmenistanyň Prezidentiniň içeri we daşary syýasy başlangyçlaryny kanunçylyk taýdan goldamak, şeýle hem raýat-hukuk gatnaşyklary babatda kanunçylygy kämilleşdirmek we talyplarda hukuk medeniýetini ösdürmekden ybaratdyr.
Maslahatyň dowamynda oňa gatnaşyjylar adam hukuklary, olary goramak bilen baglanyşykly halkara başlangyçlar, olaryň ähmiýeti barada giňişleýin pikir we sorag-jogap alyşdylar.
Şeýle duşuşyklaryň yzygiderli geçirilmegi institutymyzda bilim alýan talyplaryň hukuk biliminiň kämilleşdirilmeginde uly ähmiýete eýe bolar.
Durdymyrat ŞYHMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.