“Açyk gapylar” güni mynasybetli paýtagtymyzyň orta mekdepleriniň okuwçylary bilen tanyşdyryş çäresi geçirildi
2021-nji ýylyň 16-njy aprelinde Türkmenistanyň Daşary işler ministrliginiň Halkara gatnaşyklary institutynda “Açyk gapylar” güni mynasybetli paýtagtymyzyň orta mekdepleriniň okuwçylary bilen tanyşdyryş çäresi geçirildi.
Çäräniň dowamynda mekdep okuwçylaryna ýokary okuw mekdebimiz barada institutymyzyň mugallymlary tarapyndan gysgaça maglumatlar berildi. Tanyşdyryş dabarasynda Žurnalistikanyň nazaryýeti we amalyýeti kafedrasynyň mugallymlarynyň, şeýle hem, Halkara žurnalistikasy fakultetiniň talyplarynyň taýýarlamagynda institutymyzyň we talyplaryň durmuşyndan taýýarlanan wideorolik görkezildi. Soňra mekdep okuwçylary institutymyzyň baş binasynda guralan sergi bilen tanyşdylar. Sergide kafedralaryň alyp barýan işleri, talyplaryň dürli ýyllarda halkara we ýurdumyzda geçirilen bäsleşiklerde gazanan üstünlikleri bilen tanyşmaga mümkinçilik döredildi. Şeýle-de, ýokary derejede guralan bu tanyşdyryş çäresiniň dowamynda geljekki uçurym okuwçylar institutymyzyň muzeýi, okuw studiýasy we kitaphanalary bilen hem tanyşdyryldy. Ýokary okuw mekdebimiz barada geçirilen bu tanyşdyrylyş çäresi mekdep okuwçylarynda biziň institutymyza bolan gyzyklanmany has-da artdyrdy.
Tawus AKJAÝEWA,
Türkmenistanyň Daşary işler ministrliginiň Halkara
gatnaşyklary institutynyň Halkara žurnalistikasy
fakultetiniň 2-nji ýyl talyby.